Psalms 73
Buku 3
(Tib 73-89)
Godigo te dwai sę ebo bidi dabeba dwai dene mawai
1Godigo te Israel dabebawiegi yai mu yai.
Godigo te wiegi yai haliga elalubo
we bidi dabeba te wiegi yai sę mu ebo dao.
2Tiali goli, pąde ena te dwai sęgęba tulaluainu yali.
Ena te sągą pasega muyu,
tama ena tagalainu ebo tiwai yali.
3Magi baso meni, eno suali, te dwai sę ebo bidi dabe
te moni bidi pedalubaso,
tama eno te hagoma ebo bidi dabego
nai dabede pesa yali.
4Augwali te augwa tigide te dene me sisąwani.
Augwali te bomai bidi dabe,
tama augwa tigi te wiegi yai naga elalubao.
5Augwali te sęgę meba tolisiąyu,
te gasa bidi dabego sęgę tolobo tiwai me ebo meni.
Te gasa bidi dabe augwali te haniani sęgę tolali,
tiali goli te tobage sę augwaliba me pedalisiąbo.
6Tama augwali te odolali hagoma elama,
tama augwa tigi pemene dogia pabo dao.
Tama augwaligo gasa olo bidi dabe elama,
tama aga doliyu ebo dao.
7Te augwa haligade homugo,
augwa yainu homu ebo
te haniani dwai kolesaga augwaligo
ebaso, te pedelali.
8Augwaligo te posobo po gasa bidi dabeba weyu,
tama augwaligo te bidiba
te dwai sę yabo po wabo dao.
Augwa te hagoma mu eyu,
tama augwa te gasa we bidi dabe
dolabo sunumi gegebo po mia sabo dao.
9Augwaligo po dwai
te dagalude bidibo Godiba wabo dao.
Tama augwa digi te augwa nogi ugwaba selama,
tama augwaligo te we bidi dabede bomo eyu,
te augwaligo homu wali pao po weyu ebo dao.
10Tama te Godigo we bidi dabego
te hagoma ebo bidi dabego po wei elama,
tama augwaligo te poba homu kęą pai.
11Te dwai sę ebo bidi dabego te tiwai po wabo,
“Godigo te dago ebo sę
te mena tama me konegobeo,” wai.
“Te Ugwade Mu Bidibo Godigo te dago ebo kolesaga
te gegelama hanilama
sunumi me elalubeo,” wabo dao.
12Te dwai sę ebo bidi dabego te tama tibo dao.
Augwaligo doado bage te hauwa elaluali,
tiali goli augwaligo umabo mu sabo sę ebo dao.
13Ena bugagia tonalubaso,
tama eno haliga te wiegi yai elaluali,
tama eno te dwai sę meba me ebeo.
Te tiali sę te odolali hagawaibao, agawe?
14Magi baso meni, te giligade me hulide
God, nago dene enaba mani, tama tigidali kigamude
nago te dene enabolo mawai.
15Eno te bidi dwai dabego wabo po tiwai,
te nago we bidi dabeba wagi da,
teda eno augwali tibo po ola mayu,
te augwali homu puna palagi dao.
16Eno homu hauwa elama,
tama eno te sę page konemainu ebao,
te dwai sę ebo bidi dabego ebo sę page.
Tiali goli, te enade sesabo sę mu ebo dao.
17God te eno usu sesa pidubadi,
te ena nago be tomoba peyu, usu nigi pai.
Ena te nago bede bidiyu,
tama eno homu peda pelama,
tama te dwai sę ebo bidi dabeba
mena nai pedelabo te eno koneai dao.
18Nago augwali bilabo sunumi
te bedege mu emainu ilama,
tama nago augwali tula mumainu elama,
tama augwali mu dolomainu ilaibao.
19Augwali te polo tama dolali.
Tama augwali te isibo te dwai mu ebo dao.
20Genuai Bidi, augwali te na ebo bidi tiwai elama,
tama te na yali te kigamu be posobode silaibao.
Bidigo te kigamu hodaluama,
tama te na yali te agai homude me ma elalugobeo.
21Te sogo eno homu te midigi selama,
tama eno haligago te dwai mu yai.
22Tama eno homu te pania selama,
tama eno nago kolesaga me konesiąwai.
Eno te nago gedude kolesaga yali,
te uni hasago homu kolesaga umuna pabo tiwai ilali.
23Tiali goli, ena nage dali sesemane bidibaso,
tama nago ena nogo tolalubo dao.
24Nago ena bugagia bilimainu ebo po mawai,
tama nosali nago ena sobaso, tama ena nage dali
te dagalude bidaibao.
25Te gasa de te dagalude bidiyu,
tama ena tonalubo dawe?
Te gasa bidi me meni, naga deli naga dao.
Tialima, God, eno nage godolo mu ebao.
Eno te tigidali tǫde nai wei ebo tiwai gilama me ebeo.
26Te eno tigi, me homu kolesaga,
te bomo me elalusiąbaso da,
teda God, nago digi nago ena dąų walao.
Tama nage ena dali bidiyu,
tama ena sesemane bidada peyu,
bidada pabo sogode te ena usu mu elaluaibao.
27Mu tama, te nage tudiba mubo we bidi dabe,
teda augwali mu hagawaibao.
Tama nage polobadu te wali pali bidi dabe,
tama megi te augwaligo nage tagalubaso da,
teda nago augwali dolaibao.
28Tiali goli, ena, te ena nage pąde bidibaso,
tama te wiegi yai mu ebao.
God, Genuai Bidi, nago ena mu seselalubo da,
tama eno nago yali sę po tigidali
hanilama, pusainu ebo dao.
Copyright information for
MPS